مين ما بيحبش مصر ؟ بقلم طارق فريد

مين ما بيحبش مصر ؟
مين يقدر ينسى هواه ..
بنسيم الليل اللي عطر سماه
مين ينسي الطين
بساعات المطر والحنين ..
مين ينسي ذكرياته على شط الحب
مين ده اللي ماعندوش قلب؟
مين ينسي حضن ترابك يامصر
وانتي جوانا لمانا بلمتنا ساعة العصر
مين ينسي خيرك وارضك
وجنودك وساعات النصر
مين ينسي عظمتك
وعلمك على مر الدهر ؟؟
يالي عامل امبراطور
سيبك من عيشة القصور
دور برضه على مصر
في النجوع والكفور
مش كل مصري قال لأ
يبقا عربجي حنطور
في قلوب متهانة مداسة
بمداس مغرور
مش كل اللي قال لأ يا طور
يبقا حاقد او كاره لمصر
شوف الي بين السطور
حتلاقي ناس مش بتحب الطهور
ناس فاسدة وظلمة وحرامية
سرقوا قوتنا م الفول والطعمية
ناس سممت بدنا لوثت ميتنا النقية
نهشوا جثثنا
وباعوها حتة حتة .. للحرامية .....
في المقابر يا مغرور
2 مليون مقبور
بس عايشين وساكتين
زي جيرانهم الميتين
بس تسال الواحد فيهم
يقولك الحمد لله
يكفي اني مستوررر
فبلاش تعمل علينا وطني
وانت كبيرك عربجي حنطور.....
بلاش تزايد علينا
وتشكك بحبنا لمصرنا
انت تعرف ايه ياجربوع عن الغلابة
اللي عيان مش لاقي دواه
واللي مش لاقي شغل ياولداه
وكبيره طبق فول بعشاه
هو واللي معاه ..........

بقلم طارق فريد 

شارك