مين ؟ بقلم الشاعر محمود مسعود

مين .........؟؟
ـــــــــــــــــــــــــــــــ
مين اللي عليه الدور
يرسم بالكلمة جوابه
يهدم من حوله السور
يفتح بصراحة جرابه
حنقوله إن كان معذور
يحكيلنا ايه اللي جراله
واحد فينا قال قلبه عاش مغدور
قضي في الحب حياته
مع انه كان مشهور
دنجوان عايش بين اخواته
راهن وبكل غرور
إنها مش ترفض حبه
قدم ياما وكتيرمسرور
ظن إنها ملكت قلبه
بعد ما فضلت شهور
زهقت منه ومن حبه
في لحظة هبت كسرت قلبه
سامحيني يا نور عيني
قالها وقلبه مكسور
في الحب مافيش غرور
رحلت ولا عاوزه رجوعه
رجع لصحابة ندمان
في عيونه كتير حرمان
قالنا وهو باكي
بالذمة أبقي غلطان ؟؟
خرجت من بقي سحابة
شتيمة مش كدابة
الكل وافقني عليها
خسارة عمايله فيها
وكمان بيقول عليه
حب وكان في أديه
وبيطلب النصيحة
ياخي غور بلاش فضيحة
سيبنا باللي إحنا فيه
ــــــــــــــــــــــــــــــــــــــــــــــــــــــــــــــــــــــــ
بقلمي : محمود مسعود (( شعر عامي )) 1/2/2016م

شارك