امي بقلم صباح ضاحي
لما سألوني عنك يا امى
قولتلهم ساكنة جوة منى
دا هى بتجرى في عروقى
زى دمى
تحت رجلها حتة من الجنه
اعيش فيها انا واتهنى
لما اشكى بضمنى بعيونها
ولما ابكى دمعها بيخونها
ع خدها يجرى منها غصب عنها
نفسى آخدها انا واطير
فوق السحاب
واغزلها من النجوم
عقد وحجاب
فرشت قلبى بريش نعام
على عرشه حبيبتي انتى
ملكة من غير كلام
لما سألوني عنك يا امى
قولتلهم دانتى مولاتى
أجمل لحظات حياتى
انتى فرحى وابتساماتى
دايما يا امى بدعيلك
ربى يحميكى
ياخد من عمرى ويديكى
لما سألوني عنك يا امى
قولتلهم لما الدنيا بضيق عليا
بجرى وارمى نفسى في
حضنها هى
فجأة الليل يبقى نهار
والضلمة بتصبح نور
والحزن جوايا بيبقى سرور
لما سألوني عنك يا امى
قولتلهم لما تبعد عن عيونى
بحس بغربه في جفونى
دا هى الوطن
أجمل سكن
هى الأمان
هى الحنان
في كل مكان
واى زمان
لما سألوني عنك يا امى
قولتلهم امى ديه حكاية
محتاجة ولا الف رواية
تتكتب في دواوين
و تترسم بدمى
ديه صورتها محفوره
فى العين والننى
مين فى الدنيا دى
زيك يا امى
لما سألوني
بقلم.. صباح ضاحي
شاهد المزيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.